ملانصرالدین مجله سی

توضیحات

ملانصرالدین مجله سی
فلاتون لار و مقاله لر ۱
سرمقاله ها، یادداشت ها و مقالات مجله ملانصرالدین
جلیل محمدقلی زاده
کؤچورن: ائلیار پولاد
ناشر: پایتخت یایین ائوی
ایکینجی چاپ ۱۳۹۸
۸۷۰ صفحه
شابک: ۴-۰۴-۶۳۰۵-۶۲۲-۹۷۸

سیزی دئییب گلمیشم، ای منیم مسلمان قارداشلاریم! او کسلری دئییب گلمیشم کی، منیم صحبتیمی خوشلاماییب، بعضی بهانه لرله مندن قاچیپ گئدیرلر، مثلا، فالا باخدیرماغا، ایت بوغوشدورماغا، درویش ناغیلینا قولاق آسماغا، حامامدا یاتماغا و غیری بو نوع واجب عمللره. چونکی حکمالار بویوروبلار: «سؤزونو او کسلره دیء کی، سنه قولاق وئرمیرلر».

ای منیم مسلمان قارداشلاریم! زمانی کی، مندن بیر گولمه لی سؤز ائشیریب، آغزینیزی گؤیه آچیب و گؤزلرینیزی یوموب، او قدر «خا-خا!..» ائدیب گولدونوز کی، آز قالدی باغیرساقلارینیز ییرتیلسین و دسمال عوضینه اتکلرینیزله اوز- گؤزونوز سیلیب، «لعنت شیطانا!» دئدینیز، او وقت ائله گومان ائتمه یین کی، ملانصرالدینه گولورسونوز.

ای منیم مسلمان قارداشلاریم! اگر بیلمک ایسته سه نیز کی، کیمین اوستونه گولورسونوز، او وقت قویونوز قاباغینیزا آینانی و دقتله باخینیز جامالینیزا.

سؤزومو تامام ائتدیم، آنجاق بیرجه عذروم وار: منی گرک باغیشلایاسینیز، ای منیم تورک قارداشلاریم کی، من سیزله تورکون آچیق آنا دیلی ایله دانیشیرام. من اونو بیلیرم کی، تورک دیلی دانیشماق عیبدیر و شخصین علمی نین آزلیغینا دلالت ائدیر. آمما هردن بیر کئچمیش گونلری یاد ائتمک لازیمدیر: سالینیز یادینیزا او گونلری کی، آنانیز سیزی بئشیکده ییرغالایا ییرغالایا سیزهتورک دیلینده لای-لای دئییردی و سیز قولاق آغریسی سببینه ساکت اولموردونوز. آخیری بیچاره آنانیز سیزه دئییردی:

– بالا آغلاما، خورتدان گلر، سنی آپارار! و سیز دخی جانینیزین قورخوسوندان سسینیزی کسیب، آغلاماقدان ساکت اولوردونوز.

هردن بیر آنا دیلینی دانیشماقدا کئچمیشده کی گژزل گونلری یاد ائتمه یین نه عیبی وار؟!

«ملانصرالدین»، ۷ آپرئل ۱۹۰۶، نمره ۱