ماناس داستانی

توضیحات

ماناس داستانی
عادل جمیل
کؤچورن: نوراله پورشریف
ناشر: آذرتوران – نباتی
بیرینجی چاپ ۱۳۹۸
۳۹۲ صفحه
شابک: ۲-۲۷-۶۰۶۳-۶۲۲-۹۷۸

تورک خالق لارینین بدیعی تفکر تاریخینده اؤز توتوم و سیقلتی ایله سئچیلن محتشم آبیده لریمیزدن بیری «ماناس» تریلوگییاسی دیر. بؤیوک و اولو تورک «گؤوده سیندن» شاخه له نن فیرغیز-قیپچاق «بوداغی نین» بو بشری و یاشاری آبیده سی سوی کؤکلریمیزدن تاریخی بیلگی وئرن تایسیز قایناق دیر. «ماناس» اؤز حجمی اعتباری ایله دونیا ادبیا تی نین نادر و مونومئنتال اینجی لریندن ساییلان آدلیم ائپوس لاردان «ایلیادا» و «اودیسیا» دان ییرمی دفعه، «ماهابهاراتا» دان اوچ دفعه بؤیوکدور. بو، تکجه فیزیکی حجم بؤیوکلویو دئییل، هم ده معنا، مضمون، موندریجه بؤیوکلویودور. حاضیردا «ماناس» ین ۶۵ واریانتی موجوددور. هله ده علمه معلوم اولمایان واریانت لارین ایزلری گؤروندویو اوچون استقامت ده آختاریشلار دومام ائدیر.

سون ایللر عموم تورک داستان لارینین، داها گئنیش معنادا، تورک فولکلورونون تدقیقی و تحلیلی، اورتاق و اوخشار مدنیتیمیزه چاغداش پریزمادان باخیش تورک خالق لارینین مختلف علمی کنفرانس، سیمپوزیوم و یوبیلئی تدبیرلرینده اؤن پلانا چکیلمک ده دیر.

۱۹۹۵- جی ایلین آوقوست آییندا قیرغیزیستانین پایتختی بیشکئک شهرینده کئچیریلمیش «ماناس – ۱۰۰۰» یو بیلئی تدبیری دونیانین ۷۰-دن آرتیق اؤلکه سیندن بو اسرار انگیز داغلار دیارینا دعوت آلمیش تورکولوق لارین، ماناس شناس لارین، یازارلارین، ائله جه ده تورک جمهوریت لرینین دولت باشچی لارینی بیر آرایا گتیرمیشدی. او گونلر اونودولماز خاطیره یه چئوریلیب. من بو تدبیره «ماناس» ائپوسوندان بیر پارچا چئویررک نشر ائتدیردیییم کتابچا ایله گئتمیشدیم. اصلینده ۸۰-جی ایللردن ترجمه و تدقیق ائتمه یه باشلادیغیم «ماناس» روحومدا ابدی دولاشان و منی راحات بوراخمایاق بیر اثره چئوریلمیشدی. تدقیقات لاریمین یئکونو اولاراق «ماناس» ائپوسو و تورک داستانچی لیق عنعنه سی آدلی مونرقرافییام ایشیق اوزو گؤردو. لیکن یاریم میلیون مصراعلیق بیر داستانین ترجمه سینی باشا چاتدیراجاغیما امین اولمادیغیم اوچون ییغجام واریانت آختاریشیندا اولوب آذربایجان اوخوجوسونا «ماناس» ی تانیتماق ایسته دیم. بو واریانت تاپیلدی!