توضیحات
ساز هاوالارینا یازیلان شعرلر
حاضیرلایان: حسین ساعی
ناشر: انتشارات آناس
چاپ اول ۱۳۹۸
۱۶۰ صفحه
شابک: ۹-۶۲-۸۱۸۸-۶۰۰-۹۷۸
عاشیق یارادیجیلیغی آذربایجان ادبیاتی نین مهم بیر ساحه سینی تشکیل ائدیر. تاریخین چوخ قدیم دورلریندن باشلایاراق انکشاف ائدیب گلن بو زنگین یارادیجیلیق بو گون ده داوام و انکشاف ائتمکده دیر. عاشیق، هله قدیم دورلرده اوزان، بلکه ده داها اوللر داها آیری آدلارلا آدلانیب صنعتین اوچ نؤعنو: موسیقی، رقص و اوخوماغی بیرلشدیرن بیر صنعتکار اولموشدور. عاشیقلیق صنعتی اصل معنادا شاعرلیکدن فرقلی اولاراق ساز چالماق، رقص ائتمک، اوخوماق، شفاهی خالق ادبیاتی نین ناغیل، داستان و باشقا نوعلرینی تویلاردا، مجلسلرده ایفا ائده رک یایماق دئمکدیر. لاکن بو ایفاچی عاشیقلار سیراسیندا ائله صنعتکارلار دا اولموشدور کی، اونلار عینی زاماندا اؤز قوشدوقلاری قوشمالاری، دوزلتدیکلری ناغیللاری دا اجرا ائتمیش، باشقا پئشه کار صنعتکارلاردان فرقله نمیشلر. عاشیق خالقین سئویملیسی، اونون قلبینه، اورگینه داها یاخین صنعتکاردیر. گئنیش خالق کتله لری نین ایچریسینده بؤیوک حرمت و محبتله قارشیلانیر، خالقین شاد و غمگین گونلرینده اونلارلا بیرلیکده سئوینیب کدرله نیر. محض بونا گؤره ده عاشیق ادبیاتی و عاشیقلیق صنعتی خالق ایچریسینده حرمتله قارشیلاناراق یاشامیش و بو گون ده یاشاماقدادیر. تصادفی دئییلدیر کی، کئچن عصرین بؤیوک متفکرلریندن اولان حسنبی زردابی عاشیق شعرینه بؤیوک قیمت وئریب اونون خالق ایچریسینده کی حرمت و نفوذونو دفعه لرله قید ائتمیشدیر: بیر باخین بیزیم عاشیقلار تویلاردا اوخویاندا اونلارا قولاق آسانلارا! بو زامان بو قولاق آسانلار ائله حالا گلیرلر کی، به اصطلاحی تورک اتین کسسن ده خبری اولماز. ائله کی، سونرا توی قورتاردی، عاشیقلار ائولرینه گئتدی، بئش اون گون اوشاقلار گئجه گوندوز کوچه لرده گزنده عاشیقدان ائشیتدیگی قافیه لری اوخویا اوخویا گزیرلر و بیر بیری نین غلطلرینی دوزلدیرلر.
نقد و بررسی‌ها
هنوز بررسی‌ای ثبت نشده است.